தன்மானமுள்ள அதிரை வாசிகளுக்கு மட்டும்

தலைப்பு இப்படி வைப்பதை தவிர வேறு வழி தெரியவில்லை, ஏனெனில் தேர்தலை எதிர்நோக்கும் இந்நேரத்தில் இப்படி ஒரு தலைப்பு போட்டு எழுதினாலாவது நம் மக்கள் மனதில் படும் என்ற நோக்கத்தில் தான்.

தேர்தலுக்கு இன்னும் சில மாதங்கள் இருக்கும் நிலையில் நம் மக்கள் எவ்வகையான கோரிக்கைகளை கையில் எடுத்திருக்கிறார்கள் மறுபடியும் கேட்டு ஏமாறுவதற்கு.

இனியும் அரைத்த மாவையே அரைத்துக் கொண்டிருக்காமல் இத்தேர்தலில் சரியான பாடம் புகட்டினால்தான், அதிராம்பட்டினம் என்ற ஒரு ஊர் இந்தியாவில் இருப்பதாக மேலிடம் கீழிடம் எல்லாவற்றிற்கும் தெரியும், இல்லையெனில் மறுபடியும் அனைவரும் காதில் சங்குதான். அது என்ன நம் சமுதாயத்தவர்களின் முகத்தில் இழித்தவாயர்கள் என ஏதேனும் ஒட்டி இருக்கிறதா?, போன தேர்தல் கொடுத்த வாக்குறுதிகளை நிறைவேற்றினார்களா? அப்படி நிறைவேற்ற வில்லையெனில் ஏன் நாம் மறுபடியும் அவர்களுக்கு ஓட்டு போட்டுக் கொண்டே இருக்க வேண்டும்?, இந்த தேர்தலில் நம் அனைவரும் ஒட்டு மொத்தமாக இத்தேர்தலை புறக்கணித்தால் என்ன? மக்களே ஒன்று மட்டும் தெரிந்து கொள்ளுங்கள் நம்மால் முடியாதது எதுவும் இல்லை,  இதற்கு நம் மக்களிடம் ஒற்றுமை வேண்டும் "ஒன்றுபட்டால் உண்டு வாழ்வு " என்ற சொல்லுக்கிணங்க , இத்தேர்தலிலாவது இயக்க வேறுபாட்டை களைந்து விட்டு  அதிரை மக்கள் என்ற ஓர் அணியில் இருந்து வென்று  காட்டலாமே? 

ஞாபகம் இருக்கிறதா? Aj பள்ளி விஷயத்தில் ஒற்றுமையாக இருந்து செயல் பட்டோமே அதேபோல் இந்த தேர்தலிலும் வென்று காட்டுவோம், ஓட்டு என்பது ஒவ்வொருவரின் தனியுரிமை, சிந்தித்துப் பாருங்கள் உங்களுக்கு கிடைக்க வேண்டிய உரிமைகள் கிடைத்து விட்டதா என்று.

சரி நம்முடைய கோரிக்கைகள் என்னென்ன  :

1 . அகல இரயில் பாதை அமைப்பது

௨ .அல் அமீன் பள்ளிவாசல் எந்த தடையுமில்லாமல் கட்டுவது

3 . சுற்று சூழல் பாதுகாப்பு

அகல இரயில் பாதை:

அகல இரயில் பாதை தொடர்பாக நம் சகோதர வலைபதிவில் பார்த்தேன்,  ஏற்கனவே இதற்காக ஒதுக்கீடு செய்த நிதியை முறையாகப் பயன்படுத்தாததற்கு யார் காரணம் என்பதை அறிய வேண்டும்  அல்லது புதிதாக பட்டுகோட்டை வரை அமைக்க ஒப்புதல் அளித்த இரயில் அமைச்சகம்  அங்கிருந்து  12 கிலோமீட்டரிலிருக்கும் நம்மூருக்கு  ஏன் அமைக்க முன் வரவில்லை, இதற்கு யார் காரணம்? நம்முடைய கோரிக்கை அவர்களுடைய காதுகளுக்கு சென்றடைய வில்லையா  அல்லது இது இடையில் உள்ள அரசியல் வாதிகளின் வேலையா, அப்படி அவர்களின் காதுகளுக்கு விழவில்லையானால் எப்படி விழ வைப்பது, தனி தனியாக முனகினாள் அவர்களுக்கு காதில் கொசு மொய்ப்பது போன்றுதான், ஒன்று படுவோம் வென்று காட்டுவோம், அப்படி அரசியல் வா(ந்)தியால் தான் கோரிக்கை  அவர்களிடம் போய் சேரவில்லையெனில் அவர்களை நமதூர் பக்கமே  அவர்களை    அனுமதிக்காதிர்கள் தன்மானமுள்ளவர்களாக இருந்தால். 

2.அல் அமீன் பள்ளிவாசல் எந்த தடையுமில்லாமல் கட்டுவது

 

இதைப்பற்றி உங்களுக்கு சொல்லி தெரிய வேண்டியதில்லை, இந்த விசயத்தை எப்படி கையாளுவதென்று?. இவ்விஷயத்தில் இப்படியே மவ்னம் காத்தால் அதுவும் உங்களுக்கு சொல்லி தெரிய வேண்டியதில்லை. 

3 .சுற்று சூழல் பாதுகாப்பு:

இந்த விஷயத்தில் நம்முடைய ஒத்துழைப்பும் தேவை அதே நேரத்தில் நமதூர் பஞ்சாயத்து போர்டின் பொடுபோக்கு தனத்தை பார்த்து கொண்டு சும்மாவும் இருக்க முடியாது. ஓட்டு கேட்டு வருபவர்களிடம் இது விஷயமாக கோரிக்கை வைக்க வேண்டும் அல்லது இவைகளை தனியார் மயப்படுத்துவதற்கு உண்டான சாத்தியக்கூர்கள் இருந்தால் இதையும் கோரிக்கையாக  வைக்கலாம், தனியார் என்பது சாத்தியப்படுமா என்பது எனக்கு தெரியவில்லை, ஆனால் முயற்சி செய்து தான் பார்க்கலாமே.

எது எப்படியோ மூன்றாவதாக சொல்லப்பட்ட விஷயம் நமதூர் பஞ்சாயத்து போர்டை சார்ந்து இருப்பதால் நமதூரில் சரியான தலைமைத்துவம் அமைந்தால் அது சாத்தியப்படும் என்பது என் கருத்து, அதே போன்று மேலே சொல்லப்பட்ட 1 ,2  விஷயங்களை அலட்சியப்படுத்த வேண்டாம்.